Andrey Yuvarlak
Andrey Yuvarlak duudu 1943-cü yılda, Komrat kasabasında. 1974-cü yılda başarda Kişinövdakı İ.Repin adına resimcilik uçilişçesini. Gagauziya resimcilerin milli Birliin azası.
Kırım ayın 9-da Komrat Atatürk bibliotekasında olan toplantıda kutladılar anılmış gagauz resimcisini Andrey Yuvarlakı. Kutlamaa vardı neylän: bibliotekada Canabisinin resim sergisi açılardı hem, taman bu günnerdä, onun resimcilik uurunda yaratmak çalışmaların 40-cı yıldönümü tamamnanêr.
Bibliotekanın sergi salonu insandan taşardı. Toplantıyı Komrat Atatürk bibliotekasın direktoru Vasilisa Tanasoglu açtı. Sora, biri-biri ardı söz alıp, yubilärı kutladılar. Kişinöv TİKA ofisin koordinatoru Atilla Cem Karamollaoğlu, Gagauziya resimcilerin milli Birliin azaları, Gagauziya kultura upravleniyasını zaametçileri, poet hem “Ana Sözü” gazetanın redaktoru Todur Zanet, yubilärın dostları, yakınnarı hem senselesi.
Komrat primariyasının sovetnii İvan Trinka baaldı Andrey Yuvarlaka şiridi, angısında yazılıydı “Почетный гражданин мун. Комрат”.Taa sora, açan kutlama konuşmaları sonuna varmaa yakındılar, toplantıya geldilär büük musaafirlär: Moldovada Türkiye Büükelçisi Ahmet Ferit Ülker eşinnän hem Gagauziyanın öndercileri. Onnar da kutladılar yubilärı hem Gagauziyanın başkanı Mihail Formuzal okudu.
kendi emirini, angısına görä Andrey Yuvarlaka “Заслуженный художник Гагаузии” adı verildi. Bütün bu kutlamalardan hem konuşmalardan sora, bibliotekaya gelennerin kolaylıı oldu tanışsınnan resimcinin sergisinän dä. Sergidä hepsi janralar, angılarında yaradêr Andrey Yuvarlak, vardılar: kilimcilik, grafika, yaalı boya hem akvarel.