Düz Ava
"Düz Ava" — anılmış gagauz ansamblisi. 1972-ci yılın Küçük ay (fevral) ayında kuruldu gagauzların en anılmış, en talantlı ansamblisi “Düz Ava”. Kurdu onu Semön Vasilyeviç Pometko (gagauzlar da, Moldovada da deyärdilär ona SÊM). Ozamannar — şaşılacek bir işti, çünkü sistemanın tarafından bölä işlerä izin verilmäzdi. Ansambli kendi repertuarına gagauz halk muzıkasını, türkülerini koymaa başladı.
Küüydän-küüyä gezip “Düz Ava” şennendirärdi insannarı. Moldova hem sınır dışı kasabalarda konțert verip ansamblinin artistleri tanıştırardılar insannarı gagauz kulturasınnan. Sovet Soţialist Respublikaları Birlii daaldılar. Tarafımıza ekonomika hem politika krizisi geldi. Bu krizistä kulturaya hiç er kalmadı. Bakmadaan bu zor vakıda ansamblidä çalışan insannar korudular “Düz Ava”yı.
Korudular zerä, ansambliyi kuran Semön Vasilyeviç Pometko becerdi kendi çalgıcılarına bitiştirmää duygu hem sevgi kendi zanaatına, becerdi onnarın arasında birlik ruhu yaratmaa. Semön Pometko raametli olduktan sora, büünkü günädän, ansamblinin öndercisi olarak Tatyana Şçogoleva çalışêr. Bu insanın zaametinnän “Düz Ava” büün dä yaşêêr. Hem diil salt yaşêêr, ama gözäl konţertlär da verer.