İon Borisoviç Bass

İon Borisoviç Bass

Büük artist raametli oldu - İon Bass (25.06.1932 – 05.03.2005)

Baba Marta ayın 5-dä Moldovanın halk artisti, büük hem anılmış türkücüsü İon Borisoviç BASS raametli oldu.

Estrada artisti olarak başlayıp, o büük hem anılmış halk türkücüsü oldu. İon Bass Moldovayı 56 devlettä gösterdi. Onu repertuarında moldovan, gagauz, bulgar, türk, azerbaycan, grek, alban h.b., dillerdä türkülär vardı. Bu üzerä da hepsi halklar sayardılar onu kendilerinin: gagauzlar – gagauzların, bulgarlar – bulgarların, moldovannar – moldovannarın.

Herbir halk onun için kendi sözünü söleyecek. Biz sa var nicä, hem lääzım, söleyelim onu, ani İon BASS gagauz türkülerini dünneyä tanıdan ilk artisttir.

O, bulup, çıkarardı insan arasına gagauz halk türkülerini.

O bulup melodiyaları, yazdırardı gagauz poetlarına o melodiyalara türkü.

O, brakıp Kişinövda işini, geldi “Düz Ava” ansablisinä, onu kaaviletmää deyni.

O, zaametini saymadaan, üüredärdi genç artistleri türkü çalmaa.

İon Bass gibi talantlı bir türkücü tarafımızda taa yoktur. O bir türküyü çalarkana cancaazının bir parçasını koyardı orayı. O üzerä dä o türkülär daymalarda aramızda kaldılar, o türküleri herbir küüdä çalêrlar...

Bitki vakıtlar o zoor yaşardı, hastaydı. Eni sistemaya uyamadı. Ondan da bişey beklemäzdi. Sistemanın kendi işleri vardı. O üzerä dä son borcunu sistema Büük artistä vermedi – son yoluna geçirmää dä gelmedilär.

Bitki yola Canabisini senselesi, en yakınnarı hem küülüleri geçirdilär. İon Bassın ölüsündä sade elli kişi vardı. İon Bassı onun ana küüyündä Kirsovoda (Başküüyü) topraa verdilär.

İon Bassın bu dünneydän ayırılmasınnan gagauz, bulgar hem moldovan halk türkücülüündä büük hem zengin bir epoha bitti...

Topracıın ilin olsun İon Borisoviç! Allaa seni yanına kabletsin...

İon Borisoviç Bass

Hem bak